Ілияс Жансүгіров атындағы Жетісу университеті QS халықаралық сыйлығының «Learning Experience – Performance Improvement» номинациясын жеңіп алды. Бұл туралы dalanews.kz хабарлады. Марапат Индонезияның Денпасар қаласында өтіп жатқан «QS Summit – 2026» халықаралық саммиті кезінде табысталды. Басылымның дерегінше, бұл номинация Қазақстанның жоғары оқу орындарына алғаш рет беріліп отыр.
Салтанатты рәсімде сыйлықты университеттің Басқарма төрағасы – ректоры, профессор Ермек Бөрібаев қабылдап алды. Номинацияның қазақша атауы – «Оқыту сапасын арттыру және білім беру ортасын дамытудағы жоғары жетістіктері үшін». Ол білім беру сапасын жақсартқан, академиялық ортаны дамытқан және студенттерге қолайлы оқу жағдайын жасаған жоғары оқу орындарына беріледі.
Бағалау кезінде оқыту үдерісінің тиімділігі, профессор-оқытушылардың академиялық қызметке қаншалықты белсенді қатысатыны, студенттерді қолдау жүйесі, сондай-ақ білім алушылардың жеке және кәсіби әлеуетін дамытуға жасалған жағдайлар ескерілген.
Материалда бұл жетістік университет ұжымының оқыту әдістемесін жетілдіру, академиялық мәдениетті нығайту және студентке бағдарланған білім беру моделін дамыту жолындағы ортақ жұмысының нәтижесі екені айтылған. Халықаралық марапат отандық жоғары білімнің әлемдік академиялық кеңістікте танылуына да ықпал етеді деп күтілуде.
Дереккөз: dalanews.kz. Фото: dalanews.kz
