Білім күні Жетісу облысында төрт білім ордасы оқушыларды қабылдады. Олардың екеуі жаңадан салынған, қалған екеуі күрделі жөндеуден өткен. Бұл туралы Dalanews.kz хабарлады.
Жаңа мектептердің бірі Текелі қаласына қарасты Рудничный ауылында орналасқан. Ашылу салтанатына облыс әкімі Бейбіт Исабаев қатысты. Ғимарат 200 оқушыға есептелген, сонымен бірге 30 балаға арналған шағын орталық бар. Биыл мұнда 145 бала білім алып, 38 мұғалім сабақ береді. Мектепте асхана, мәжіліс залы, физика, химия және биология кабинеттері, сандық мультимедиялық сынып, шеберханалар мен робототехника бөлмесі қарастырылған. Нысан Білім беру инфрақұрылымын қолдау қоры есебінен салынды. Екінші жаңа мектеп Панфилов ауданының Сұптай ауылында пайдалануға берілді.
Көксу ауданындағы Бозтоған ауылының Мұсабек атындағы мектебі мен Ескелді ауданындағы Елтай ауылының Сәкен Сейфуллин атындағы мектебі күрделі жөндеуден кейін қайта ашылды.
Басылымның мәліметінше, облыс құрылғаннан бері өңірде 24 жаңа білім беру нысаны салынып, 27-сі күрделі жөндеуден өткен. Бейімделген ғимараттардағы мектептер саны 2022 жылғы 75-тен 37-ге дейін қысқарған.
Дереккөз: Dalanews.kz. Фото: Dalanews.kz
