Жетісу облысындағы Қапал ауылының маңында археологтар ежелгі қоныстың орнын зерттеп жатыр. «24KZ» арнасының мәліметінше, ғалымдар бұл қаланы біздің дәуіріміздің X ғасырына жатқызады. Табылған жәдігерлер мұндағы тұрғындардың мал шаруашылығымен қатар егіншілікпен де айналысқанын көрсетеді.
Қазба жұмыстары негізінен қаланың орталық бөлігі – бір кезде биік қорғанмен және күзет мұнараларымен қоршалған цитадель маңында жүргізілуде. Зерттеушілер қыш ыдыс сынықтарын, керамикалық бұйымдарды және мал сүйектерін тапқан. Шаруашылық шұңқырлардан бидай, арпа, тары қалдықтары шықты. Ескерткіш Қапал-Қызылағаш қалашығы деп аталып отыр, ал оның орнын жергілікті өлкетанушы Роман Мартыненко анықтаған.
Қапал округінен барлығы 500-ден астам көне ескерткіш тіркелген. Олардың қатарында Қалақай ғибадатханасы мен Баянжүрек жотасындағы петроглифтер бар. Ғалымдардың болжамынша, кешеннің аумағы он гектардан асады, жақын маңнан некрополь мен екі керуен-сарайдың орны да табылған. Ескерткішті толық зерттеуге әлі бірнеше жыл қажет болады.
Дереккөз: 24.kz. Фото: 24.kz
