Қаратал ауданы елімізде күріш өсірілетін ең солтүстік өңір саналады. Ауа райы қолайлы бола бермесе де, жергілікті диқандар биыл мол өнім алып отыр, деп хабарлады Vestnik19.kz.
Солардың бірі – 1997 жылы құрылған «Опытное» өндірістік ауыл шаруашылығы кооперативі. Оның 1707 гектардан астам жерінде биыл 334 гектар күріш, 428 гектар жүгері, 159,6 гектар күнбағыс және 140 гектар арпа егілген. Су тапшылығы күшейіп отырған кезде қаратал диқандары егіс алқабын кеңейтудің орнына бар жер мен суды тиімді пайдалануға, озық агротехнологияны енгізуге басымдық беріп отыр.
Кооператив басшысы Ержан Қайсановтың айтуынша, биыл күріш өсіруде тәжірибесі мол қызылордалық мамандар шақырылған. Олармен бірге себу, суару, минералды тыңайтқыш енгізу және егісті күту кезеңдері қайта жолға қойылды. Нәтижесінде өткен жылы гектарына орта есеппен 33 центнер болған өнімділік биыл 45 центнерге жетті. Егіс көлемі азайғанымен, өнім артып, су да үнемделген.
Шаруашылық техника паркін де жыл сайын «ҚазАгроҚаржы» АҚ-ның лизинг бағдарламалары арқылы жаңартып отырады. Биыл тағы төрт бірлік техника сатып алынған.
Дереккөз: Vestnik19.kz. Фото: Vestnik19.kz
