Талдықорғанда ерекше білім беру қажеттілігі бар балаларға арналған инновациялық техникалық шығармашылық бойынша қысқа мерзімді курстар басталды. Жобаны мемлекеттік әлеуметтік тапсырыс аясында «QRobotics foundation» қоғамдық қоры жүзеге асырып отыр, деп хабарлады Vestnik19.kz.
Сабақтар «Future-IT» робототехника мектебінің 250 шаршы метрлік алаңында өтеді. Курс есту, сөйлеу және тірек-қимыл аппараты бұзылған 5 пен 18 жас аралығындағы кемінде 25 баланы қамтуға арналған, алайда қатысуға ниет білдіргендер саны жоспардан асып кеткен. Мектеп директоры Дамир Нұркежановтың айтуынша, бағдарлама шамамен 90 күнге есептелген және жалпы көлемі кемінде 36 сағат. Балалар жасы мен дайындығына қарай кіші және ересек топтарға бөлінген.
Оқушылар LEGO Education SPIKE Prime конструкторларымен робототехника мен бағдарламалауды, 3D-модельдеуді және лазерлік технологияларды үйренеді. Әр қатысушы 3D-принтерде кемінде үш бұйым және лазермен кесу арқылы бір жұмыс жасайды. Балалармен тәжірибесі үш жылдан асатын төрт тәлімгер айналысады.
Курс соңында қалалық инклюзивті робототехника турнирі өтеді. Барлық қатысушыларға сертификат, диплом және медаль табысталады. Жобаның басты мақсаты – балалардың инженерлік технологияларға тең қол жеткізуіне, әлеуметтенуіне және ерте кәсіби бағдарлануына жағдай жасау.
Дереккөз: Vestnik19.kz. Фото: Vestnik19.kz
