Жетісу облысының намысын қорғайтын «Малайсары» жағажай футболы командасы халықаралық сахнаға шығуға дайындалып жатыр. Ел ішіндегі жеңістен кейін ұжым клубтар арасындағы әлем чемпионатының алдын ала кезеңінде Қазақстан атынан ойнайды, деп хабарлады Vestnik19.kz.
Команда жақында чемпион мәртебесін тағы бір мәрте дәлелдеді. Қазақстан Суперкубогы үшін өткен тартысты сында жетісулықтар павлодарлық «Арман» клубын екі рет ұтып, сериядағы екі кездесуде де жеңіске жетті.
Енді ұжымның алдында одан да ауыр сынақ тұр. Алдын ала раундтың жеребесі бойынша «Малайсары» D тобына түсті. Мұнда команда француздық «Марсель», Сальвадордың «Гарита Палмера» және бельгиялық «Юнион Вреде» клубтарымен кездеседі.
Алдағы турнир жетісулық спортшылар үшін әлемнің мықты клубтары арасында өз шеберлігін көрсетуге таптырмас мүмкіндік болмақ. Ауылдан басталып, әлем біріншілігіне дейін жеткен команданың жолы облыстың бүкіл спорт қауымы үшін үлкен мақтаныш екені атап өтілді.
Дереккөз: Vestnik19.kz. Фото: Vestnik19.kz
