Талдықорғанда 11 қазанда «Таза Қазақстан» бағдарламасы аясында жалпықалалық сенбілік өтті. Оған мемлекеттік мекемелер мен мердігер ұйымдардың қызметкерлерін қоса алғанда, 2 800-ге жуық тұрғын қатысып, нәтижесінде 70 тонна қоқыс шығарылды, деп хабарлады Tinfo.kz.
Тазалық шарасы «Самал», «Жастар» және «Мүшелтой» шағынаудандарын, сондай-ақ Айналма жол, Жалайыр, Рақыш және Абай көшелерін қамтыды. Жұмысқа 40-қа жуық арнайы техника тартылды. Сенбілік барысында көшелер, жаяу жүргіншілер жолдары мен қоғамдық аумақтар тазартылып, абаттандыру жұмыстары жүргізілді.
Қала әкімдігінің өкілі мұндай сенбіліктер «Таза Қазақстан» экологиялық акциясының бір бөлігі екенін айтты. Оның сөзінше, қалада 30 проблемалық нүкте анықталған. 1 қазаннан бастап қала 30 күндік жұмыс үшін төрт учаскеге бөлінген, осы аптада бірінші учаскедегі жұмыстар толық аяқталған. Әкімдік өкілі шараға қатысқан белсенділерге, мекеме қызметкерлеріне және білім басқармасына алғыс білдірді.
Мұндай шаралар қаланың тазалығын сақтауға және тұрғындардың экологиялық мәдениетін арттыруға бағытталған.
Дереккөз: Tinfo.kz. Фото: Tinfo.kz
