17 қазанда «Алтынемел» ұлттық паркінің аумағындағы Шолақ тауларында «Құландар мекені» фестивалі ұйымдастырылады. Шара өңірдің табиғи мұрасын, археологиясын, ұлттық мәдениетін және спорттық белсенділікті бір алаңға тоғыстырмақ, деп хабарлады Vestnik19.kz.
Фестивальдің басты ерекшелігі – қатысушылар құландарды бақылап, зоологтармен тілдесе алады. Сондай-ақ археологиялық барлауға шығып, осы өңірде сақталған петроглифтер туралы көбірек білуге мүмкіндік бар. Белсенді демалыс сүйетіндерге арнап 10 шақырымдық кросс өткізіледі.
Жеке алаңдар ұлттық музыкаға, қобыз өнеріне, көне түркі жазуына және дәстүрлі қолөнерге арналады. Бағдарламада батырлар өнері, семсер мен айбалта сермеу шеберлігінің көрсетілімі, халық қолөнері бойынша шеберлік сабақтары, қолдан жасалған бұйымдар жәрмеңкесі және экологиялық сабақтар бар. Қатысушыларға экспедиция кезіндегі қауіпсіздік ережелері де түсіндіріледі.
Қонақтар таба нан мен палау дәмін татады, ал музыкалық бөлімді «Арқайым» фолк-рок тобы толықтырады. Ұйымдастырушылардың мақсаты – «Алтынемелдің» табиғи, тарихи және мәдени мұрасын тікелей араласу, практикалық сабақтар және дала экспедициясының атмосферасы арқылы таныстыру.
Дереккөз: Vestnik19.kz. Фото: Vestnik19.kz
