Жетісу облысының Панфилов ауданында жалпы қуаты 40 МВт болатын «Жаркент-2» күн электр станциясы пайдалануға берілді. Жобаның құны 5,8 млрд теңге. Бұл туралы облыс әкімдігінің баспасөз қызметіне сілтеме жасап, Kapital.kz хабарлады. Жаңа нысан Жаркент қаласы мен маңындағы елді мекендерді электр қуатымен қамтамасыз ете алады.
Облыстық әкімдіктің мәліметінше, станция өңірдің энергетикалық тәуелсіздігін нығайтуға, табиғатқа түсетін салмақты азайтуға және аудандағы тұрғын үйлер мен Қорғас агломерациясындағы кәсіпорындарды тұрақты таза энергиямен жабдықтауға арналған. Жаңа станция іске қосылғаннан кейін облыстағы жаңартылатын энергия көздері нысандарының саны 20-ға жетті. Өңір электр энергетикасының жалпы белгіленген қуаты 370 МВт болса, оның 291 МВт-ы осы нысандардың үлесінде.
Облыс әкімінің орынбасары Асет Қанағатовтың айтуынша, қазір аймақта 15 су электр станциясы, 2 жел электр станциясы және 3 күн электр станциясы жұмыс істейді. Ол жаңа станция генерациялық қуатты арттырып, электрмен жабдықтаудың сенімділігін күшейтетінін атап өтті. «Жаркент-1» күн электр станциясының директоры Серікбай Кобелеков 50 гектар аумаққа әрқайсысының қуаты 650–680 Вт болатын 62 мың күн панелі орнатылғанын жеткізді.
2026–2028 жылдары облыста жалпы қуаты 170 МВт-тан асатын тағы 9 жаңартылатын энергия көзі нысанын пайдалануға беру жоспарланып отыр.
Дереккөз: Kapital.kz. Фото: Kapital.kz
